• Mar 13, 2023
• Desa Harus
• Sosial Masyarakat

Senin - 13 Maret 2023

HARUS - Hati asa kada karuan rasa dapatnya banjir nang kada baampihan masih mahinggapi parasaan bubuhan warga Desa Harus. Kayapa kada, matan pamulaan tahun 2023 sampai wayahini banyu satumat-satumat badalam, balum lagi tinggal mahitung hari haja masuk sudah bulan puasa. Warga pinggir sungai nang tarandam rumah tu nang maras, ada nang sudah basisimpun babarasih malihat banyu sudah pina surut kaisukan harinya harau ada pulang banyu kiriman matan pahuluan, kada lah pilu. Nang rabah bakandaraan karena jalan lincar tu kada kahitungan lagi jumlahnya, ada nang parak tacabur kasungai.

Mandangar habar urang banyak rabah bakandaraan sigap ai bubuhan pamudaan lawan relawan pemadam kebakaran desa manyikati jalan nang lincar-lincarnya. Kada sampat siang, malam bubuhannya turunan. Cuma nang ngaran banyunya balum jua mau surut total jadi warga paham haja jua ada nang mambarsihi jalan di muka rumahnya masing-masing.

Desa Harus ini andaknya di tepian aliran Sungai Tabalong, basabalahan lawan dingsanak anum yaitu Harusan dan Sungai Baring. Katiganya marupakan kawasan rawa dataran rendah nang apabila hujan labat di pahuluan, nang di hilir kada kasandangan manampung darasnya arus kahidupan dunia.

Syukurnya, warga nang sudah talatih kesabarannya berkat warisan paninian dan leluhur kawa haja balapang dada manarima kenyataan pahit ini sambil baharap mudahan banyu lakas jua surut seperti sediakala paparak puasaan ini sakira nyaman tuha anum handak baibadah.

Kamudian terakhir, malalui tulisan nang nyaman dipahami ini. Mudah-mudahan ada perhatian dari pemerintah nang di atas batukar pikiran lawan pemerintah desa kayapa sakira ini bisa diatasi. Mungkin bisa dikaruk sungainya supaya manambah daya tampung sungai atau ada nang baisi solusi lain bisa jua kita pandirakan.

 

 

Editor : Mas Yus